من هذاك اليوم صاد عني روحي والقرين
والفرح ما عاد لقيته خلص يوم زعل راعيه
من هذاك اليوم وأنا جالس أتأمل حزين
ساكت وأنا ساكت ودمع الضحك قدرنا نبكيه
من هذاك اليوم والثواني تعدي مثل السنين
وقلت إذا ما راضاني يبشر أنا اللي أراضيه
ليه طول الزعل وليه نترك للأسئلة التخمين
مشتاقة لصوته أذوني ولوصله كل ما فيني يناجيه
نحتار وليه الحيرة والحب بيننا هو اليقين
ليه نغير ملامح الصورة الجميلة كافي تشويه
سواد الدنيا في بعده ما يغيره أي تلوين
وحيد على كثرة الناس ووقتي بالنوم أقضيه
ترى في الحب الفوز للي يكويه الحنين
والثاني بعد فايز والصلح هو اللي نبيه
وين إتصالاتك ليه صعبة عليك مرة تلين
ليه الحزام اللي به تشد ظهرك راميه
من هذاك اليوم أدعي يحن وأقول أمين
أسعى له بالخير ومدري وش هي مساعيه
من هذاك اليوم أحلم وأحلامي كلها تأبين
لقلبي اللي إندفن حي وما غير الهموم تنعيه
من هذاك اليوم وأنا بين الحياة وبين
يوم الله لا يعيده يوم ماله شبيه
خلاص إنت اللي تكسب وإنتصارك علي مبين
بس طبطب على المهزوم ولو بالكذب لاغيه
حبيبي لين ما خبرت منك أنا غير اللين
وإذا قسيت مسموح يللي بصبر يرجع لماضيه
يللي حبك فطرة في طبعي مع التكوين
ورغم العيوب تبقى منزه في نظري تنزيه
يللي حبك كل يوم ألقنه للشعر تلقين
من أول فصيحه أحبك وحتى أخر عاميه
من هذاك اليوم وأنا في همي سجين
خليني في سجني ولا الحكم بالحضن ألغيه
السبت
١٤٤١/٥/٣٠ هـ
ليست هناك تعليقات:
إرسال تعليق